BAGUIO CITY – Impaulog ni La Trinidad Mayor Romeo Salda ti Executive order No. 06, series of 2020 a mangibilbilin iti panakaimplementar ti haul-back policy iti masakupan ti munisipyo.
Sigun kenkuana, paset daytoy ti pakabuklan nga addang ti lokal a gobyerno tapnu maipasigurado ti panakasustinir ti kina-epektibo ti solid waste management program ti La Trinidad, Benguet.
Imanmandato ti baro a pammilin a nasken nga iyawid dagiti vegetable farmers, truckers ken traders dagiti trimmings ken dadduma a basura a mapataud iti panangilakoda kadagiti mulada iti La Trinidad Vegetable Trading Post, iti Benguet Agri Pinoy Trading Center ken dadduma a trading centers sadiay.
Maitunos ti pammilin iti polisiya ti gobyerno a panaka-adaptar ti systematic, comprehensive ken ecologically-friendly solid waste management program a mangipasigurado iti umno a panakaimaton dagiti basura.
Sigun iti mayor, agtultuloy ti panangadaptarda kadagiti addang ken solid waste management program a maitunos iti linteg para iti panakasalaknib ti nakaparsuaan.
