BAGUIO CITY – Pagam-amkan ita dagiti strawberry famers sadiay La Trinidad, Benguet ti agbalin nga epekto kadakuada ti agtultuloy a panakailako ti imported nga strawberries partikuklar ti Korean strawberries iti a merkado ditoy pagilian.
Iti interview ti Bombo Radyo Baguio, kinuna ni Peter Bulangen, dadaulo ti Swamp Farmers Association Incorporated nga ita ket saanda pay a marikna ti epekto ti panakailako dagiti imported nga strawberries kadagiti nagduduma a merkado sadiay Metro Manila.
Sigun kenkuana, daytoy ket gaputa awan paylaeng ti maapitda nga strawberries nangruna ta bassit ti nagmula iti daytoy iti napalabas a planting season ken iti panakadadael dagiti immunan a naimula nga strawberries iti napalabas a nepnep a sinaruno ti bagyo.
Nupay kasta, kinunana a dakkel to ti agbalin nga epekto ti presensia dagiti imported nga strawberries gaputa addan ti kakompetensia dagiti naimula ditoy lokalidad.
Innayonna a posible a maabak dagitoy nangruna ta naamuan a nalaklaka dagiti Korean strawberries no idilig kadagiti strawberries nga agtataud iti lokalidad malaksid iti maka-awis a kadakkel dagitoy.
Mangnamnama pay dagiti strawberry farmers iti lokalidad a dagus a marisut ti pakaseknan iti iligal a panakaiserrek iti pagilian dagiti Korean strawberries nangruna ita nga adda paylaeng ti pandemya ken saan paylaeng a nakasubbot ti kaaduan a mannalon.
