BAGUIO CITY -Agtultuloy ti panangwanawan ti ama ti Itogon, Benguet iti epekto ti nepnep iti masakupan ti munisipyo.
Iti interview ti Bombo Radyo Baguio, kinuna ni Mayor Victorio Palangdan nga adu ti dinadael ti nepnep sadiay, nangruna dagiti kalsada, balay ken mula.
Nupay kasta, kinunana a nawaknitanen dagiti kalsada a nakapasar ti panagreggaay ti daga ken bato malaksid iti maysa a kailuklukat a kalsada.
Dinakamatna nga uppat ti balay a naan-anay a nadadael sadiay Itogon bayat a 56 ti nakapasar ti dadael.
Innayonna nga adda met ti nasurok 400 nga indibidual a naapektaran iti nepnep ken nagbakwit kadagiti kabagian dagitoy.
Kabayatanna, kas panagsagana ti Itogon kontra iti COVID-19 ket imbilinna ti nainget a panangipatungpal dagiti barangay officials kadagiti paglintegan kontra iti COVID-19.
Impettengna a no mabalin ket saan a rumwar dagiti umili no saan a napateg ti ranta dagitoy.
Innayonna a maikalkalikagum latta kadagiti agturong sadiay ti negative result ti RT-PCR test nangruna no awanan paylaeng iti vaccination card.
Pinagyamanan pay ni Mayor Palangdan ti panangidonar ti maysa a kompanya ti minas iti 1,000 doses ti AztraZeneca vaccine a maipaay kadagiti umili ti Itogon, Benguet.
