Pagdandanagan ti House Prosecution panel ti kontrobersyal a video nga imbinglay ni Sen. Pia Cayetano seknan iti face-off da Sen. Alan Peter Cayetano ken House prosecutor Chel Diokno.
Immuna a nababalaw ti “spliced video” nga inaramid ni senator-judge Pia agsipudta, maatap a naigagara a na-edit ken maatap a naigarara a nasabalian ti konsteksto daytoy manipud iti orihinal a kopya.
Sigun kenni House panel spokesperson Atty. Benjamin Tolosa Jr., ad-adalen ti prosecution no dakamatenda iti Senate Impeachment Court ti nasao a video.
Iti baet nga immuna a sinungbatan ken inlawlawag ni Rep. Diokno ti nasao a pakaseknan, naipadamag a maseknan ti House panel iti tignay ti senador-judge.
Kamaudiananna, adda latta iti presiding chair ken dagiti kameng ti impeachment court no awaganda ti atension wenno balakadanda ni senador-judge Pia seknan iti nasao a video.
Patien ni Atty. Tolosa a saan a simple nga isyu daytoy ken kasapulan ti naannad a panangusig, nangnangruna no maipapan kadagiti implikasionda iti agtultuloy a trial.