BAGUIO CITY – In-inot a marikrikna ti epekto ti pangta ti coronavirus iti sektor ti turismo ditoy siudad ti Baguio.
Sigun kenni Andrew Pinero, pannakangiwat ti Hotel and Restuarant Association of Baguio (HRAB), adda dagiti turista a nangkanselar kadagiti inpareserbada nga akomodasion kadagiti hotels ken inns ditoy siudad.
Inlawlawagna a kaaduan kadagiti nangkanselar a turista ket dagiti gangannaet nga agtaud pay iti sabali a pagilian.
Kinuna ni Pinero a saan met nga apektado iti coronavirus dagiti nasao a turista ngem tarigagayda laeng ti agannad gapu ta maibilbilang kas sangalubungan a pakaseknan ti parikot iti nasao a sakit.
Nupay kasta, kinunana nga adu latta dagiti lokal a turista nga agturturong ditoy lokalidad nangruna ta natuloy ti pannakailukat ti Panagbenga 2020 itay agsapa uray saan a naipatungpal ti Grand Opening Parade.
