Inlawlawag ti Philippine Coast Guard (PCG) nga awan ti eroplano ti Pilipinas wenno dagiti barko ti Pilipinas a napapanaw iti Bajo de Masinloc, kasungani ti kinuna ti Chinese Coast Guard (CCG).
Sigun kenni Commodore Jay Tarriela, pannakangiwat ti Philippine Coast Guard for the West Philippine Sea, nangipatungpal dagitoy ti panagpatrolia iti baybay a paset ti Bajo de Masinloc tapno maipasigurado ti kinatalged ken seguridad dagiti mangngalap a Pilipino.
Impaganetgetna a boluntario a pimmanaw dagiti barko ti PCG ken eroplano ti BFAR iti lugar kalpasan a nakompletoda ti misionda a mangipaay iti abasto kadagiti mangngalap a Pilipino, saan a gapu iti aniaman a pannakapapanaw ti Chinese Coast Guard.
Sigun gamin iti China, simrek ti eroplano ti Pilipinas iti airspace ti China, ken kinunada pay a nagtayab ti eroplano ti Philippine C-208 iti rabaw ti Scarborough Shoal iti West Philippine Sea itay kanikadua.
Ikalkalintegan latta ti China a kukuada ti Scarborough Shoal nga adda iti uneg ti exclusive economic zone (EEZ) ti Pilipinas.
Gapu iti dayta, inakusaran ti embahada ti China idiay Manila ti Pilipinas gapu iti panaglabsingda iti soberania ti China ken karbenganda iti baybay.
Iti agdama, awan pay ti komento ti embahada ti Pilipinas idiay Beijing, China.
