Kayat ni Defence Secretary Gilberto Teodoro Jr. a rumbeng a mabaliwan ti linteg ti “espionage” wenno panagespia iti pagilian ken maipakat daytoy bayat ti panawen ti kappia.
Sigun kenkuana, kayatna a dagos a maamyendaran ti nasao a linteg tapno madusa dagiti aglabsing ken makagaraw a nasayaat ti gobierno.
Kasaruno ti imparang ni Davao Oriental Representative Cheeno Miguel Almario a dokumentario bayat ti House Quad Committee inquiry a naipatungpal idi napalabas a lawas nu sadinno, naipakita a ni dismissed Bamban, Tarlac mayor Alice Guo wenno Guo Hua Ping ket maysa ng espiya iti Pilipinas.
Kas sungbat, impaganetget met ni dismissed Guo a saan nga espiya daytoy ket kinunana nga ay-ayatenna ti Pilipinas.
Kabayatanna, maipalagip a ni dismissed Guo ket sumangsango ti kaso a graft, qualified human trafficking, money laundering, ken tax evasion.
Iti agdama, naibalud daytoy idiay Pasig City Jail.
