BAGUIO CITY – Nainget nga iwanwanawan ita ti Food and Drug Administration (FDA) dagiti establishimento ditoy Baguio nga agilaklako ti antigen self-test kits kasaruno ti panakaipalubos ti panagaramat iti nasao a kagawaan ditoy siudad.
Iti panakiuman ti Bombo Radyo Baguio, kinuna ni FDA-Cordillera Licensing Officer Saturnina Pandosen a dua laeng a kompanya ti naipaayan ti special certification nga agilako ti antigen self-test kit isu’t gapuna a saan a nalaka ti agilako kadagitoy.
Kinunana nga adda dagiti pagalagadan a nasken a masurot kadagiti kayatda ti agilako iti nasao a produkto.
Innayonna a sukimatenda metlaeng ti presyo ti antigen self-test kit manipud iti overpricing nangruna ta magatang ita ti maysa a self-test kit iti P280-P300.
Kagiddan iti daytoy, inyapela ni Pandosen ti dagus a panagreport kadakuada dagiti umili no adda dagiti makita wenno maduktalanda nga establishimento nga agilaklako ti saan a nasertipikaran a self-test kits.
Iti agdama, mabalin a gumatang dagiti umili iti antigen self-test kits kadagiti napili a district health centers iti siudad.
