BAGUIO CITY – Natalgeden ti kasasaad ti maysa a 16-anyos nga estudyante a binagsol ken tinutokan iti natirad a banag ti saan pay a nabigbig a suspek sadiay Napayew, Kayapa, Bakun, Benguet idi kanikadua.
Iti panakiuman ti Bombo Radyo kenni PO3 Aurelio Paplunot, investigator ti Bakun Municipal Police Station, linawlawaganna ti immunan a naipadamag a narames ti biktima a residente iti nasao met laeng a lugar.
Kinunana a kas maibasar iti medical record ti biktima ket saan daytoy a narames ngem nagsagrap daytoy iti maysa a bagsol iti tiyan ken sugat iti tengnged ken ima daytoy.
Maibasar iti inisyal nga imbestigasyon dagitoy, posible nga inuray ti suspek ti biktima iti dalan ket inaramidna ti nasao a krimen.
Kinunana a posible a limmaban ti biktima ken insarsarapana ti imana iti gandat a panangbagsol ti suspek kas maibasar kadagiti sugat nga adda iti ima daytoy.
Nupay kasta, kinuna ni PO3 Paplunot nga urayenda pay ti opisyal nga ibaga ti biktima nga iti agdama ket agpapaimbag iti maysa nga ospital sadiay La Union.
Maipalagip nga iti agsapa ti Mierkules ket nakita laengen ti maysa nga estudyante ti daradara a biktima a nakadasay iti dalan.
Dagus daytoy a nagkiddaw iti tulong ken intarayda ti biktima iti ospital.
