BAGUIO CITY – Naipisok iti pagbaludan ti maysa nga estudyante a nangdanog ken nangpangpangta iti maysa a kameng ti National Bureau of Investigation iti uneg a mismo ti opisina dagitoy sadiay Upper Session Road, siudad ti Baguio idi rabii.
Nabigbig daytoy a ni Ivan Christian Mulato Silaroy, 23, tubo ti Benguet ken residente ti City Camp Central bayat a ti biktima a saanna a kayat a mainaganan ket agtawen iti tallopulo ket dua ken kameng ti NBI Special Investigation Section.
Maibasar iti blotter ti pulisya, sinitar ti gwardiya ti managan Jason Domingo Pagulangan gapu iti panagisbo daytoy iti alad ti NBI compound.
Nagkiddaw iti dispensa ni Pagulangan sakbay a pimmanaw ngem nagsubli a kadwana ti suspek a ni Silaroy.
Pinagsasawan ti suspek ti gwardiya isut gapuna nga inawisda daytoy iti uneg ti NBI office tapnu ilawlawagda ti pudno a napasamak.
Nupay kasta, naghuramintado ti suspek, binugkabugkawanna ti biktima sakbayna daytoy a dinanog.
Dagus met a nagtawag iti pulis dagiti kakadwa ti biktima a nangitunda iti panakakemmeg ti suspek.
Sumangsango ita ti suspek iti kaso a direct assault ken threat.
