BAGUIO CITY – Natalgeden ti kasasaad ti maysa nga estudyante kalpasan a pinaltoganna ti bukodna a bagi iti pagab-abanganna sadiay Upper Bonifacio Street, Baguio City idi malem kalman.
Agtawen daytoy iti duapulo, ken 3rd year Architecture student iti maysa nga unibersidad ditoy siudad.
Maibasar iti imbestigasyon, tallo a babbai nga agab-abang met laeng iti nasao a lugar ti nakangeg iti asog ti biktima nga agpatpatulong.
Sinapolda ti pagtataudan ti asog agingga a nakagtengda iti ridaw ti maysa a siled ngem saanda a malukatan ti ridaw.
Napanda inala ti tulbek iti landlady ken idi linukatanda ti siled ket nakitada ti babai a nakaidda iti katri nga agparparigat nga aganges.
Inatap dagiti babbai a makapaspasar daytoy iti asthmatic attack isut gapuna a pinakalmada ngem inyaraasna a pinaltoganna ti bagina.
Dagusda a nagkiddaw iti tulong ken naitaray ti biktima iti maysa nga ospital.
Kinuna met ti attending physician a nagsagrap ti babai iti tama ti paltog iti kannigid a barukongna ken limsot iti abaga daytoy.
Naipaima met iti police investigator ti handgun nga addaan iti maysa a basyo.
