BAGUIO CITY – Agpapaimbag ti maysa nga estudyante kalpasan a pinakpak ti maysa a lalaki ti ulo daytoy babaen iti dakkel a bato sadiay Jacinto Street, Baguio City idi rabii.
Nabigbig daytoy a ni Aaron Padsongay Golingab, 19, ken residente ti Woodsgate, Camp 7, Baguio City bayat a ti suspek ket nabigbig laeng iti nagan a “Mark” nga adda iti legal nga edad.
Maibasar iti imbestigasyon, nagturong ti biktima iti nasao a lugar tapnu alaen ti librona a binulod ti gayem daytoy.
idi paawid daytoy ket nakitana a makiap-apa ti kadwana iti tallo a lalaki.
Bimmalaet ti biktima ken dagiti kakadwana agingga a naanawa dagiti agaapa.
Kabayatan ti pannagna ti biktima ken dagiti kakadwana paturong sadiay Upper Magsaysay tapnu agawid ket nangala ti suspek iti dakkel a bato ken intupakna iti ulo ti biktima.
Dagus a naglibas ti suspek ken ti dua pay a kakadwana iti direksyon ti Upper Magsaysay bayat a ti biktima ket intaray dagiti kakadwana iti Baguio General Hospital and Medical Center.
Iti met panagresponde dagiti pulis ket nabaelanda a kinemmeg ti maysa kadagiti menor de edad a kadwa ti suspek, ken naipaima iti Women and Children’s Protection Desk para iti umno a disposisyon.
Maibasar met iti medico-legal certificate ti biktima, naamuan a nagsagrap daytoy iti sugat iti left occipital area ti ulo daytoy.
