BAGUIO CITY – Malamlamayan ita ti maysa nga estudyante a pimmusay kalpasan a dinungpar ti maysa nga SUV nga addaan iti plaka a CSN-227 sadiay Sinipsip, Amgaleyguey, Buguias, Benguet idi rabii.
Nabigbig daytoy a ni Yawi Martinez Mariano, 16, grade 10 student ken residente iti nasao a lugar bayat a ti driver ti lugan ket ni Nolly Lingling Esiong, 33, naasawaan, mannalon ken residente ti Madaymen, Kibungan, Benguet.
Maibasar iti imbestigasyon dagiti otoridad, paturong ti lugan sadiay Abatan, Buguias, Benguet ken napartak ti panagpataray ti driver agingga a nadungpar ti biktima a bumalballasiw iti kalsada.
Gapu iti daytoy ket naipurwak ti biktima iti sumagmamano a metro a kaadayo bayat a nagtultuloy ti lugan agingga a naidungpar iti poste ti kuryente.
Intaray dagiti maseknan a residente ti biktima iti Lutheran Hospital, Abatan, Buguias, Benguet ngem naideklara a dead on arrival gapu iti multiple head ken body injuries.
Naipasidong met iti medico legal examination ti driver ken naamuan a nakainom daytoy iti arak.
Naiturong daytoy iti Buguias PNP para iti kanayunan nga imbestigasyon ken panakaidatag ti kaso kontra kenkuana.
