BAGUIO CITY – Naminsan manen nga impalagip ti lokal a gobyerno ti Tuba, Benguet ti panangsurot dagiti turista kadagiti pagalagadan ti munisipyo partikular ti saanda a panagturong kadagiti lugar a saan a nakalukat para iti publiko.
Daytoy ket kalpasan a nalmes ti maysa nga estudyante kasaruno ti panaglangoyda iti Colorado Falls sadiay Barangay Twin Peaks idi kalman.
Segun kenni Municipal Tourism Officer Anabelle Solano, nasarakan laengen iti pagtintinnagan ti danum ti disuor ti bangkay ti lalaki nga agtawen iti sangapulo ket siyam ken 3rd year college student sadiay Occidental Mindoro.
Kinunana nga immunan nga impassera ni Board Member ken sigud a Tuba Mayor Florencio Bentrez ti nasao a disu-or gaputa adu ti nalmes sadiay ken awan metlaeng ti nabukel a safety measures.
Naamuan met a 14 amin dagiti estudyante a nagturong sadiay pakairamanan ti driber dagitoy ken awan metlaeng ti kadwada a mannursuro kabayatan ti panagpasyarda.
Kinunada met a saanda a panggep nga agdigos sadiay gaputa paawiden dagitoy ngem idi limmabasda sadiay ket napagnumuanda nga aglangoy.
Gapu iti daytoy ket kinuna ni Solano a no panggep dagiti turista nga agpasyar sadiay ket nasken nga agturongda pay iti barangay wenno saan ket iti munisipyo.
