Lagangilang, Abra- Nadangran ti agtawen ti 18 nga estudiante ti University of Abra iti makannawan a sakana kalpasan a pinaltugan ti padana nga estudiante iti ruar ti pagadalan idiay Sitio Mapaloong, Barangay Poblacion, Lagangilang, Abra idi Agosto 22, 2025.
Iti exlusive interview ti Bombo Radyo Baguio kenni PLTCOL. Daniel Pel Ey, Provincial Information Officer ti Abra Provincial Police Office, kinunana a nabigbig ti biktima a ni Prince Albert Barbosa, residente ti Sitio Masanad, Barangay Libtec, Dolores.
Sigun kenni Pel-ey, napasamak ti insidente iti oras ti alas 3:40 ti malem.
Maibasar iti imbestigasion, inasar ti suspek ni Barbosa iti uneg ti pagadalan ken kalpasan daytoy ket inurayna iti barangay road.
Ditoy na a pinalpaltugan iti tallo a daras, ken nagsagrap ti maysa a tama ti makannawan a sakana.
Nabigbig ti gunman a ni Jave Talaga Bragas, 24-anyos, estudiante metlaeng ti nasao nga unibersidad ken residente ti Calao, Bucay.
Kaduana kas drayber iti motorsiklo a naglugananda a ni Mark Kevin Amaro, 18-anyos, residente ti San Isidro, Lagangilang, Abra ken maysa metlaeng nga estudiante.
Sigun iti pulisya, nakainum ti nasangir nga arak ni Bragas idi napasamak ti insidente.
Dagos a timmakas dagiti suspek kalpasan ti pammaltog a nakalugan iti motorsiklo.
Narekober iti crime scene ti dua a basyo ti caliber .45 ken maysa a deformed slug.
Iti agdama, agpatpataming paylaeng iti pag-agasan ni Barbosa iti Abra Provincial Hospital.
Agtultuloy met ti maipatpatungpal a manhunt operation kadagiti otoridad para iti dagos a pannakakemmeg dagiti suspek a sumangsango iti kaso a frustrated homicide..//Benjo
