Pimmusayen ti sigud a Director General ti Bureau of Corrections (BuCor) ken Deputy Director ti National Bureau of Investigation (NBI) a ni Rafael Ragos.
Kinumpirmar daytoy ti kasinsinna a ni Winston Ragos, ngem saanen a nangipaay iti kanayonan a detalye maipapan iti rason iti ipupusay daytoy.
Maipalagip a ni Ragos ti maysa kadagiti testigo kontra kenni sigud a Senador Leila de Lima a naakusaran a mastermind iti panaglako iti iligal a droga iti New Bilibid Prison idi Justice Secretary paylaeng daytoy.
Ti testimonia daytoy ti nakaibatayan ti pannakaipila ti maysa kadagiti tallo a drug case kontra kenni de Lima iti Muntinlupa Regional Trial Court.
Nupay kasta, imbabawi ni Ragos ti testimoniana idi Abril 2022 ken kinunana a napilitan nga agulbud gapu iti bilin idi ni sigud a National Police Commission (NAPOLCOM) Commissioner Vitaliano Aguirre II.
Gapu iti pannangisanodna iti testimonia, naabsuelto ni de Lima idi May 2023.
Nakipagrikna met ni Mamamayang Liberal party-list Rep. Leila de Lima iti pamilia ni Ragos no sadino, pinadayawanna daytoy gapu iti panangibutaktak iti agpayso.
