Note: The photo on the right is AI-generated and is for illustration purposes only.
Manamnama a maipatungpal iti Baguio City ti Fantasy Parade imbes a horror parade inton Oktobre 25 kalpasan nga inaprobaran daytoy ti Baguio City Council itay nabiit.
Iti interview ti Bombo Radyo, kinuna ni Councilor Edison Bilog a maysa daytoy kadagiti uppat a konsehal a saan a pimmabor iti nasao a panggep gapu iti pakaseknanda nga adda ti maimatangan a folklore kas iti aswang, tiyanak ken manananggal.
Impetteng pay ni Bilog a nupay ti panggep ti fantasy parade ket malagip ti halloween, kasla agbalbalin ngamin daytoy a commercialism.
Iti baet daytoy, napatgan ti nasao a parada kalpasan a siyam kadagiti konsehal ket pimmabor iti pannakaipatungpal daytoy iti uneg laeng ti maysa nga aldaw idiay Session Road.
Mangnamnama met ni Bilog nga ikonsidera ti organizer dagiti pakaseknanda a ti maipatungpal a parada ket saan unay a nakapokus iti minatayan, wenno violence a posible a mangitunda iti negatibo nga epekto kadagiti agbuya.
