Agtuloy inton bigat, Setyembre 28, ti panagngato ti singir iti pamasahe kadagiti pampubliko a lugan, bayat nga ipatpatungpal ti transport group a MANIBELA ken PISTON dagiti nakaplano a protestada gapu iti agtultuloy a panagngato ti presyo ti petrolyo iti pagilian.
Iti sidung ti naaprobaran a baro a pamasahe ti Land Transporation Franchising and Regulatory Board (LTFRB), ngumato iti P14 ti sigud a P13 a minimum fare kadagiti ordinaryo a jeep iti tunggal uppat a kilometro. Bayat a manayunan daytoy iti P2 kadagiti sumarsaruno pay a kilometro.
Kabayatanna, para met iti modern public utility jeepners, agbalin a P17 ti minimum a pamasahe a manayunan met iti P2.40 iti sumarsaruno a kilometro.
Ngumato metlaeng iti singir dagiti pampasahero a city ken provincial bus.
Imbilin met ti Department of Transporation kadagiti operator a mangikabil kadagiti baro a kopya iti baro a fare matrix ken agipaayda latta kadagiti diskuwento kadagiti estudyante, senior citizen, ken kadagiti persons with dissabilities.
