Narugianen idi kalman ti pannakaipatungpal dagiti nagduduma nga aktibidad para iti maikatlo a Farmers and Fisherfolks Month iti munisipyo ti La Trinidad ita a bulan ti Mayo nu sadinno maisayangkat ti sangapulo nga aktibidad.
Iti panakiuman ti Bombo Radyo kenni Nida Organo, Municipal agriculturist iti munisipyo ti La Trinidad, kinunana a nangrugi ita nga aldaw ti Farmer Official For A Day ken Product Promotion Fair: La Trinidad Dako-an agingga inton May 29.
Kinuna ni Organo a panggep ti nasao nga aktibidad a maipaayan ti pannakabigbig dagiti mannalon kas “backbone” iti Pilipinas.
Kinunana pay a dagiti mannalon ti “mangpakpakan” kadagiti kaaduan a Pilipino gapu kadagiti mulada nga agriculture products rason a kasapulan a maipaayanda iti “limelight” ken mabigbig iti potensialda.
Gapu iti dayta, al-allukuyenna dagiti amin a mannalon iti munisipio a makipaset iti nagduduma nga aktibidad nga insagana ti municipal agriculture office.
Mainaig iti dayta, imbinglay ti municipal agriculturist a nasurok 7K ti naka-rehistro a mannalon iti nasao a munisipyo ita a bulan, nababbaba manipod iti puntiriada a 9,500.
Nupay saanda a nagun-od ti bilang ti registered farmers iti nasao a munisipyo, kinunana a ngumatngato latta ti bilang dagiti mannalon iti nasao a munisipyo nu idilig kadagiti napalpalabas a tawen.//Bombo Genzel Depayso
