BAGUIO CITY – Guyguyugoyen ti maysa a mixed martial arts coach dagiti agtutubo iti lokalidad tapnu makipaset dagitoy iti maisayangkat a FightCon 2018 wenno ti kaunaan ken kadakkelan a fight and fitness convention ditoy pagilian inton March 2 ken 3 sadiay Baguio Athletic Bowl.
Sigun kenni Tribal TOROGI Head Coach Christian Gazmin nga organizer ti nasao nga event, dumar-ay iti nasao nga aktibidad ni agdama nga ONE world heavyweight champion Brandon “The Truth” Vera, ti Pinoy UFC fighter a ni Jenel Lausa ken dagiti Cordilleran fighters nga addaan iti nagduduma a discipline.
Kinunana a panggep ti aktibidad a maidanun kadagiti grassroots wenno kadagiti agututbo ti sports tapnu maipakita dagiti talento dagiti ubbing manipud iti nagduduma nga MMA clubs.
Innayonna a babaen iti daytoy ket adda pay dagiti madiskobre a talento dagiti ubbing nga atleta iti martial arts.
Karaman kadagiti aktibidad ti MMA competition, mano mano: grappling competition, obstacle race, skateboard competition, auto and bike show, battle of the bands, demos and exhibitions ken ti food and exhibit booths.
Naituding a sangwen dagiti atleta manipud iti nagduduma a MMA club iti rehion dagiti fighters manipud sadiay Metro Manila ken adduma a lugar.
Innayon ni Coach Gazmin nga iti kanito nga agballigi ti aktibidad ket daytoy ti agbalin a caravan iti Northern Luzon.
