ABU DHABI, UNITED ARAB EMIRATES – Agladladingit ita ti pamilia, Philippine Nurses Association ken dadduma pay iti ipupusay ti maysa Filipina Nurse idiay Abu Dhabi gapu iti vehicular accident itay nabiit.
Kinumpimar ti Philippine Embassy sadiay Abu Dhabi ti ipupusay iti biktima a ni Reyna Jane Lucero Donelo, 32 anyos manipud sadiay Nueva Vizcaya.
Sigun iti Filipino diplomats iti nasao a lugar, manarimaan ti panangasikaso ti Migrant Workers Office (MWO) babaen iti Department of Migrant Workers (DMW) iti kaso daytoy.
Maibasar iti imbestigasion, naudi a sinumrek iti trabohana ni Donelo idi Sabado, Oktobre a singko iti agdama a tawen sakbay a naaksidente daytoy iti kabigatanna, Oktobre a sais.
Ti 32-anyos a biktima ket simmangpet sadiay United Arab Emirates idi Agosto iti agdama a tawen ken nangrugi a nagtrabaho iti Al Raiaa Home Health Care.
Manamnama metten nga agbiahe ti asawana sadiay United Arab Emirates inton sumaruno a lawas.
Sigun iti kabagian ti biktima, addaan daytoy iti maysa nga anak a lalaki nga agtawen iti 12 ken maysa nga anak a babai nga agtawen iti pito.
Kidkidawen ti pamilia ti pimmusay a maiyawid iti pagilian ti bangkay daytoy ken maipaay ti hustisia.
Kabayatanna, impasigurado ti embahada a maaramid dagiti kasapulan a legal ken procedural steps tapno masigurado a maawat ti pamiliana ti tulong a kasapulanda bayat ti panagtultuloy ti imbestigasion.
