BAGUIO CITY – Impasigurado ni Filipino boxer “King” Arthur Villanueva a nakasaganan daytoy para iti eight-rounder a labanda kenni American boxer Elijah Pierce iti Overtime Elite Arena, idiay Atlanta, Georgia, United States inton Marso a trenta.
Iti panakiuman ti Bombo Radyo kenni Villanueva, inaklonna a dakkel a panag-adjust ti inaramidna nangruna ta adu ti adbentahe ti makalabanna nu sadino ub-ubing daytoy ti sangapulo a tawen ken dakdakkel ti bagina rason a manamnama met ti napigsa a danugna.
Malaksid iti dayta, karaman pay a karit para kenni Villanueva ti nangato a porsiento ti knockout (KO) ni Pierce.
Inaklon ni Villanueva a narigatan daytoy kadagiti nakalabanna a southpaw nu sadino kadawyan kadagiti gundaway ket naabak daytoy rason a pagsagsaganaana ti labanna kenni Pierce a maysa metlaeng a southpaw.
Iti sabali a bangir, nalpasen ti hard training daytoy idi napan a lawas nu sadino naipasidong daytoy iti sangapulo a round ti sparring, ken panagtaray iti sangapulo a milya.
Iti agdama, addan daytoy iti light training ken nakapokus iti panang-adal kadagiti techniques ken styles ti makalabanna.
Innayon ni Villanueva a saan pay a todo ti panagbawas daytoy ti timbang nu sadino seven pound pay ti masapol a maikissay tapno madanun daytoy ti 123pounds para iti superbantam weight division.
Kabayatanna, napateg para iti nasao a Filipino boxer nga agballigi iti nasao a laban tapno makasubli daytoy iti world championship.//Bombo Rob Dominguez
