BAGUIO CITY – Agtultuloy ti fire safety campaigns nga ipatpatungpal ti Baguio City Fire Station nangruna ita a maob-obserbaran ti Fire Prevention Month.
Segun kenni SFO2 Camilo Balancia, panakangiwat ti nasao nga opisina, karaman kadagiti ipatpatungpalda a programa ti Ugnayan sa Barangay ken agturturongda kadagiti nagduduma a barangay ken pagadalan para iti fire drills.
Innayunna nga ipatpatungpalda met laeng ti house to house fire safety information campaign ken agiwarwarasda iti flyers a nakailanadan dagiti impormasyon nu kasanu a maliklikan ti puor.
Kagiddan iti daytoy ket immapela ti opisyal iti publiko a saanda a baybay-an dagiti nakasaang iti kusinada, dagiti kandila agramanen dagiti appliances gaputa dagitoy dagiti nailistada a kangrunaan a pagtataudan ti uram ditoy siudad.
Ti tema ti Fire Prevention Month ita a tawen ket “Buhay at Ari-arian ay Pahalagahan, Ibayong Pag-iingat sa Sunog ay sa Sariling Pamayanan Simulan.”
