Maar-aramat itan ti first floor ti New Public Market ti Sayangan, Paoay,Atok, Benguet kas temporaryo a parking space dagiti pasyente wenno kliente ti Atok District Hospital.
Daytoy ket kagiddan ti impaiyulog ni Atok Mayor Franklin Smith a pammilin idi bulan ti Disyembre idi napan a tawen tapno marisut dagiti pakaseknan ti publiko maipapan iti kinakurang ti pagparadaan.
Maipalagip nga idi napalabas ket nagwaras iti social media ti pablaak ti maysa a citizen maipapan iti saan a panakaipaay iti prayoridad kadagitoy nga agpark iti asideg iti Atok Municipal Hall tapno mapan agpacheck-up iti pagagasan.
Kasaruno dayta, naibaon dagitoy nga agturong laengin iti upper ground ti maysa a pagadalan nga ad-adayo gapu ta ti nasao a pagparadaan ket para kadagiti turista.
Immunan a kinuna ni Mayor Smith iti napalabas a panakiuman iti Bombo Radyo kenkuana nga awan ti parking space ti Atok District hospital isu’t gapuna a drop and go dagiti lugan.
Gapu iti dayta, nangiruar daytoy iti pammilin a maaramat ti kadsaaran ti baro a public market a manarimaan a maar-aramid kas parking area dagiti agturong iti ospital.
Innayon pay ti Mayor nga adda ti manarimaan a mailepleppas a sabali a parking lot iti likudan ti munisipyo.
Kagiddan dayta, agyamyaman met ni Smith gapu ta adda dagiti pribado nga establishimento nga agpatpatakder kadagiti bukoddaa a parking lot.
Inlawlawag pay ni Mayor Smith nga ipangpangrunada dagiti pasyente nga agturong iti ospital ken awan ti ilaklaksid dagitoy nga indibidual.
Kabayatanna, makidkiddaw iti publiko a direkta a tumawag dagitoy iti linya iti opisinada apaman a makapasar dagitoy iti parikut agsipudta 24/7 a nakatukat ti linya iti kominikasyon iti opisina ti mayor.
