BAGUIO CITY – Tarigagay ti maysa kadagiti atleta ti Cordillera a nakaiyawid iti balitok a medalya nga ibagi manen ti rehion iti sumaruno a Palarong Pambansa.
Iti panakiuman ti Bombo Radyo kenni Jeremiah Hipol nga atleta iti athletics elementary division, daytoy ti kaunaan a gundaway a nakipaset daytoy iti Palarong Pambansa ken kayatna a nayunan pay ti nasao a kapadasan.
Kinunana a nabayag dagitoy a nagasnay para iti nasao a kompetisyon ken ti panangabakna ti resulta ti nainget a panagsanay daytoy.
Iti baet ti pananggun-od daytoy iti balitok a medalya iti 1500 meters run, inaklon ti atleta a narigatan daytoy iti nasao a kategorya gapu iti kinaadayo daytoy.
Ni Hipol ket naka-ayayam iti lima a category ti running events ken nakaala daytoy iti balitok a medalya iti 400 meter dash, 800m dash ken iti 1500m dash.
Kinunana pay a dakkel ti epekto ti kinabara ti panawen sadiay Antique iti performance-na, nupay kinunana a saan met daytoy a narigatan nga ag-adjust.
Nagyaman met daytoy kadagiti nangsuporta kadakuada sakbay ken kabayatan ti ayayam.
Dinakamatna a naalada metten ti cash prize dagitoy nga impaay ti DepEd Cordillera.