Balligi ti naisayangkat a fishing tournament sadiay Burnham Park idi laeng kalman, nu sadino nagun-od ni Cris Ballesca ti umuna a pwesto, kalapsan a nakabanniit daytoy iti tattlo nga ikan nga 26 inches, sumaruno ni Cris Agas a nakabanniit ti dua a 23 inches, makaitallo ni Ronnie Paulino a nakaala met ti dua nga addaan ti kadakkel a 21 inches.
Iti panakiyuman ti Bombo Radyo kenni Rafael Serrano, Coordinator ti nasao a fishing tournament, dinakamatna a dumanon iti dua pullo ket maysa ti pakabuklan a bilang dagiti ikkan a nabanniit iti nasao nga aktibidad, nu sadino maipaayan dagiti nangabak iti Cash prize ken trophy kadagiti sumaganad nga aldaw.
Karaman kadagiti dua pullo ket wallo nga indibidual a nakipaset dagiti ubbing, turista manipud Abra, Ilocos ken sumagmamano a ganggannaet manipud iti pagilian a United Kingdom.
Sigun kenni Serrano, kasapulan ti P500 a registration fee, license manipud iti City Environment and Parks Management Office tapno makipaset iti nasao a toneso.
Inyunay-unay ti nasao nga opisial a natalged a sidaen dagiti ikkan kas iti Tilapia, Cat fish, Coy fish , shrimps ken dadduma pay nga ikkan iti Burnham lake, agsipudta nasayaat ti kalidad ti danum maibasar iti kaudian a panangsukimat dagiti maseknan nga ahensia iti daytoy.
Kabayatanna, manamnama a maangay ti maikapito a Fishing tournament inton Sitiembre iti agdama a tawen.//mp4
