--Ads--
BAGUIO CITY – Imimbestigaran dagiti otoridad ti panakapaltog ti maysa a flagman sadiay Korba, Camp 3, Tuba, Benguet idi rabii.
Ti biktima ket maysa a menor de edad a flagman ti manarimaan a road construction iti nasao a lugar bayat a saan pay a nabigbig ti suspek.
Maibasar iti report ti pulisya, ti nagluganan ti suspek ket asul a kotse nga addaan iti plaka a 5669.
Naamuan a pababa ti kotse ken dinungpar daytoy ti road signage sakbay a pinaltogan ti suspek ti biktima.
Naitaray ti biktima iti ospital bayat a naalerto metten ti Rosario ken Sison PNP para iti posible a panakabigbig ken panakakemmeg ti suspek.
