BAGUIO CITY – Dumanonen iti 66 percent ti nalpas iti flood control project, partikular ti panakaikabil ti drainage system iti football ground ti Melvin Jones.
Sigun kenni Councilor Elmer Datuin, naponduan ti proyekto iti P38-M ken daytoy ket ipatpatungpal ti Baguio City District Engineering Office.
Kinunana a manamnama a malpas ti patrabaho inton Setyembre a narugian iti deppaar ti BGHMC a nagturong iti Athletic Bowl, dimmalan iti skating rink sakbay iti Melvin Jones ken rumuar iti Harrison Road.
Dinakamatna a nakabilan iti tolda ti nasao a patrabaho iti football ground tapnu awan ti mapasamak nga aksidente nangruna ta tallo a metro ti kauneg ti drainage system.
Impeksana pay a babaen iti proyekto ket marisut ti parikut iti panaglayos iti Burnham Park, nangruna iti dan-aw sadiay.
Immuna metten a kinuna ti City Environment and Parks Management Office nga aniaman a madadael iti panakaipatungpal ti proyekto ket naikari a sukatan ken isimpa ti mangimatmaton iti proyekto.
