BAGUIO CITY – Naimbaganen manipud iti COVID-19 ni Flora, Apayao Mayor Rodolfo Juan.
Imbinglay ti 76-anyos a mayor ti naimbag a damag babaen iti social media account daytoy kalpasan a nakaruar iti isolation facility ti Flora District Hospital idi kalman.
Nangipablaak pay daytoy kadagiti ladawanna a nakaiggem ti banner a nangilanad a naimbaganen daytoy manipud iti nasao a sakit.
Naamuan a nagpositibo iti coronavirus ni Mayor Juan idi April 2 ken naipaayan iti tag a “PhApayao591”.
Naamuan pay a naakaran daytoy iti nasao a sakit kalpasan a nakapulapolna ti maysa nga opisyal ti militar.
Nupay nabalakadan nga ituloyna ti panag-home quarantine iti sabali pay a pito nga aldaw, dinakamat ti mayor a nasayaat, nasalun-at ken napigsa daytoy.
Impeksana met ti panagyamanna kadagiti amin a nangtaripato ken nangas-asikaso kenkuana kabayatan ti kaaddana iti isolation facility ken kadagiti amin a nagtrabaho iti lokal a gobyerno ti Flora, Apayao kabayatan ti kaawanna iti opisina.
Palpalagipan pay ti mayor ti publiko iti panangituloyda nga agtulnog iti minimum public health standards ken iti saan a panagruar iti pagtaengan dagiti ubbing nga agtawen ti sangapulo ket walo nga agpababa ken dagiti agtawen ti innem a pulo ket lima nga agpangato.
