BAGUIO CITY – Makaaw-awis ita iti adu a kustomer ti maysa a flower shop sadiay Assumption Road, Baguio City gapu iti naidumduma a disenyo dagiti bouquet a mailaklako sadiay.
Magatang iti nasao a flower shop dagiti bouquet nga addaan iti arak, pang-chaser, kasta metten dagiti ramen ti momma kas iti gawed ken bua ken adda pay ti nateng, prutas ken dadduma pay.
Magatang pay sadiay ti maaw-awagan a care bouquet a naglaon kadagiti kagawaan a manglapped iti panagwaras ti virus kas iti sabon, sanitizer, alcohol ken dadduma pay ken adda pay ti bouquet a naarkusan iti play money.
Inlawlawag ti agtagikua iti shop a ni Antonio Paulite a napanunotna ti agaramid iti makunkuna a Taraki Bouquet tapno adda met ti magatang a mairegalo kadagiti lallaki tapno saan laeng a dagiti babbai ti makaawat iti sagut ita a Valentines Day.
Dinakamatna a mabalin nga ipa-customized ti gatangen dagiti kustomer ken depende ti presio iti maikarda iti bouquet.
