BAGUIO CITY – Pagparparikutan dagiti opisyal ti Buguias, Benguet ti maipadpadamag a panagraira ti maysa a kita ti prostitusion sadiay.
Sigun kenni Mayor Ruben Tinda-an, agraraira ita sadiay Buguias dagiti “fly-by-night” a babbai a mangilaklako iti apagkanito a ragsak kadagiti mannalon.
Kinunana nga agsapsapul dagiti suspek kadagiti mangipaay kadakuada iti kuarta ken kalpasanna ket saanen dagitoy nga agparang.
Nupay kasta, kalpasan ti sumagmamano a bulan ket agsubli manen dagitoy nga agsapul iti mabiktima iti nasao a munisipyo.
Impetteng ti mayor a mangituntunda iti naalas nga imahe ti Buguias ti nasao nga isyu ti prostitusion.
Kabayatanna, agkalkalap met ti Buguias Municipal Police Station iti impormasion para iti pannakabigbig dagiti nasao a “fly-by-night” prostitutes iti masakupan dagitoy.
Naamuan nga awan pay ti nakemkemmeg a babbai a mangipatpatungpal iti nasao a prostitusyon sadiay gaputa saan a dakdakamaten dagiti suspek ti nagan dagitoy kadagiti biktimada.
Pagan-annaden pay ti pulisya dagiti umili ti Buguias kontra kadagiti nasao a babbai gapu iti parikot a mabalin nga itunda ti pannakinaig kadagitoy kas iti panagwaras ti sakit nga HIV/AIDS.
