Inlawlawag ti Bureau of Immigration (BI) a mabalin a maipasidong iti government intelligence investigation, dagiti ganggannaet ditoy pagilian nga addaan ti student visa, apaman a mapaneknekan a nairaman dagitoy iti iligal nga aktibidad.
Sigun kenni Norman Tansingco, Commissioner ti Bureau of Immigration (BI), posible a sukimaten ti National Intelligence Coordinating Agency (NICA) ken ti National Bureau of Investigation (NBI) dagiti ganggannaet nga addaan ti student visas para kadagiti posible nga aktibidad dagitoy a maikontra iti seguridad ti estado.
Malaksid iti dayta, inlawlawag ni Tansingco a mabalin laeng nga ipaay ti Bureau of Immigration (BI) ti student visa kadagiti foreign nationals nga in-endorso dagiti lehitimo a pagadalan, Commission on Higher Education (CHED) ken masapul nga agisubmitir ti regular a report iti Bureau of Immigration (BI) dagiti amin a pagadalan nga umaw-awat kadagiti foreign nationals nga studyante, tapno mamonitor ti panagtungpalda iti visa, ken ti panagtungpalda kadagiti pagalagadan a mainaig iti edukasion.
Kasaruno daytoy iti umad-adu a bilang dagiti Chinese nationals a naipaayan ti student visas idiay Cagayan, nu sadino impeksa ni Tansingco a nasken nga imbestigaran dagiti intelligence agencies ti gobyerno ti aramid dagiti ganggannaet nga estudiante, tapno masigurado ti sigurad ti pagilian.
