Kinumpirmar iti Department of Foreign Affairs (DFA) a nangipiladan iti formal diplomatic protest iti China kalpasan nga impakammo daytoy ti gandatna a mangimuntar iti national nature reserve iti Scarborough Shoal wenno iti Bajo de Masinloc.
Ti nasao a tignay ket mangipakita iti undisputed ken formal articulation iti Pilipinas seknan iti saan daytoy a panagannugot iti pangpanggepen a tignay iti China.
Malaksid iti dayta, kiniddaw metten ti National Maritime Council iti China a raemen daytoy ti karbengan iti Pilipinas iti nasao a paset iti ta-aw ken isardengnan dagiti tignay nga agpangpangta iti regional peace ken stability.
Maipalagip nga inwaragawag iti China a mangimuntar daytoy iti national nature reserve iti Scarborough Shoal wenno Bajo de Masinloc.
Sigun iti State Council ti China, ti panakaaramid ti reserve ket napateg para kadakuada tapno mapagtalinaed ti diversity, stability, ken sustainability ti natural ecosystem iti Huangyan Island- maysa a triangular chain dagiti reefs ken batbato.
Malaksid iti dayta,patienda a babaen iti daytoy ket mapaingtan pay ti supervision ken law enforcement dagitoy kadagiti iligal ken irregular nga aktibidad a patienda a maipatpatungpal sadiay.
