BAGUIO CITY – Manamnama a sumangpet ditoy siudad ti Baguio dagiti freezers a pakaidulinan dagiti COVID-19 vaccines sakbay nga agleppas ti agdama a bulan ti Enero.
Sigun kenni Mayor Benjamin Magalong, agsagsaganadan para iti pakaikabilan dagiti dadduma a bakuna a maipaay iti lokal a gobierno nupay saan a kasapulan a maikabil iti freezers dagiti bakuna a ginatang ti siudad manipod iti AstraZeneca.
Kinunana nga adda latta ti maipaay a bakuna iti siudad manipod kadagiti sabali a pharmaceutical companies a gatangen ti nasyonal a gobierno isut gapuna a daytoy ti pagsagsaganaanda.
Manamnama a sumangpet ditoy siudad dagiti bakuna nga ipaay ti National Task Force iti maikatlo a kwarter ti tawen 2021 isut gapuna a nasken a nakasagana ti pakaidulinan dagitoy.
Imbinglay pay ti mayor nga addan dagiti dadduma a freezers ditoy siudad a pakaikabilan dagiti COVID-19 vaccines a maipaay para iti Baguio.
