Umap-apela ita iti city government dagiti sumagmamano a meat vendors iti Baguio City Public Market gapu iti nainget a kompitensya iti nagbaetan dagitoy ken dagiti frozen meat vendors.
Iti panakiuman ti Bombo Radyo kenni Bong Alvar, maysa a meat vendor, ti laengin panangipababa iti presyo dagiti lakoda a karne ti pamuspusan tapno adda ti gumatang kadagitoy kagiddan ti umad-ado a kakompitensyada nga aglaklako met ti frozen meat.
Sigun kenni Alvar, pinadasda nga ipangato ti presyo ti lakoda a fresh meat idi ngimmato ti farmgate price dagitoy, ngem naobserbaranda a bimmassit dagiti aggatang.
Gapu iti dayta,kapilitan nga impababada ti presyo ti fresh meat nupay dandani awanen ti maganansyada.
dagita satellite market nga inyopenda idi pandemic, nalpas ti pandemic-en dapat insaradan. Awan, dire-diretso ti lakoda. Isunga kanyami nga agnegnegosyo ti karne ditoy palengke, nagkapsot. Survival of the fittest ti mangmangyari kanyami ditoyen.
Bong Alvar- Market Vendor | Baguio City Public Market
Kagiddan dayta, kwinestyunaranna ti panakaiyimplimintar ti zoning ordinance iti Baguio City ken ti panakaipaay ti business permit gapu iti naobserbaran a panagtaud dagiti adu unay a pagtagilakwan ti masida kas kadagiti frozen meat iti merkado publiko.
Inlawlawag ni Alvar a dagiti maang-angkat a frozen meat ket kadawyan nga wholesale rason a nababbaba ti presyo dagitoy bayat a dagiti ilaklakoda a fresh meat ket naggapo pay iti slaughter ken mailako iti retail price rason a nanginngina.
Mainaig iti dayta, kidkiddawen ni Alvar iti maskenan nga opisina a rumbeng a pagsinnabalyenda ti maipaay a business permits iti wholesale ken iti retail.
Innayona a sakbayda a mangipaay ti permit nangruna kadagiti aglaklako ti karne, nasken a sukimatenda pay ti lugar a pagtagilakwan gapu ta sigun kenkuana, adun dagiti agkaiwara.
Insingasing pay ni Alvar a nu saanda nga isardeng ti panangipaay ti permit, masapol ngarod a kontrolinda koma.
Kabayatanna, makidkiddaw metlaeng ti panakaisardeng dagiti satellite markets gapu ta nalpas metten ti pandemya.//Bombo Rob Dominguez via Bombo Jez Lapizar
