Impakaamo ni Transportation Secretary Vince Dizon a nakasagana ti gobierno a mangipaay ti fuel subsidy kadagiti nasurok a 1.1 milion a bus, jeepney, tricycle, ken ride-hailing application drivers apaman a ti presio ti krudo ket lumabes iti $80 iti tunggal bariles a threshold iti tengga ti mapaspasamak a gulo iti nagbaetan ti Israel ken Iran.
Iti Palace press briefing, kinuna ni Dizon a “fully prepared” ti administrasion ni Marcos tapno maiyemplementar ti Fuel Subsidy Program (FSP) para iti public transport sector, a maitunos iti 2025 General Appropriations Act (GAA).
Sigun pay iti nasao nga opisial, pakabuklan iti P2.5 billion ti nailatang babaen ti 2025 General Appropriations Act para iti Fuel Subsidy Program, ken kanayonan a P617 million ti maala manipod iti 2024 a pondo.
Agnumar iti Fuel Subsidy Program ti mapatta-patta nga 1,132,407 nga indibidual, pakairamanan ti 258,712 Public Utility Vehicle (PUV) operators ken drivers, 723,695 tricycle drivers, ken 150,000 ride-hailing application drivers.
Maipaay ti fuel subsidy babaen iti adu a wagas tapno masigurado ti napardas ken nasayaat a pannakaiwaras, kas iti agdama a Pantawid Pasada wenno fuel cards, registered e-wallets, bank-to-bank transfers, ken cash distribution babaen ti Land Bank of the Philippines.
Kinuna ni Dizon a dimmanon iti $78 ti presio ti krudo iti tunggal bariles iti napalabas nga aldaw, nababbaba ngem ti kasapulan a threshold iti sidong ti 2025 GAA.
