Nakadanonen iti plenario ti Senado ti gakat a maiyakar ti 2025 BSKE inton Mayo 2029, ken mapalawa iti termino dagiti opisial ti barangay ken SK agingga iti innem a tawen.
Daytoy ket babaen ti panagisponsor ni Senate electoral reforms committee chairperson Imee Marcos.
Ti naipila ket ti Senate Bill 2816 a naglaon ti Committee Report 317 bayat ti plenary session idi kalman.
Kalpasan ti May 2029 Barangay ken Sanguniang Elections, kinuna ni senador Marcos a ti regular election ket maisubli kalpasan ti innem a tawen.
Malaksid iti daytoy, kinuna ti senador a ti panangisaad ti termino dagiti barangay officials ken kameng ti SK ket mangipasigurado a saan a pulos a maigiddan ti BSKE iti nasional ken lokal nga eleksion.
Maipaayan pay ti COMELEC iti umdas a panawen tapno masigurado ti natalna ken naurnos nga eleksion.
Naangay ti naudi a BSKE idi Oktubre 2023 kalpasan nga indeklara ti Korte Suprema a maikontra iti konstitusion ti linteg a nangitantan iti pannakaipatungpalna manipud iti umuna nga eskediul idi Disiembre 5, 2022, agingga iti maudi a Lunes ti Oktubre 2023.
Sigun iti nangato a korte, ti sumaruno a BSKE ket maipatungpal iti umuna a Lunes inton Disiembre 2025 ken kalpasan ti tunggal tallo a tawen kas maitunos iti Republic Act 11462.
Kinuwestunar ti gobierno ti Korte Suprema a maikonsidera ti desision daytoy, ngem ti apela ket nadismisar.
