Inaprobaranen ti Senado iti maikatlo ken maudi a pannakabasa ti maysa a gakat a mangikeddeng iti termino dagiti opisial ti barangay ken Sangguniang Kabataan iti uppat a tawen.
Naaprobaran ti Senate Bill 2816, wenno ti singasing nga Act Setting the Term of Office of Barangay Officials and Members of the Sangguniang Kabataan, babaen ti 22 nga affirmative votes, zero negative votes, ken zero abstentions.
Sigun kenni Senador Imee Marcos, sponsor ti nasao a gakat, maangay inton Oktubre 20 ti tawen 2027 ti eleksion, ken tallo nga agsasaruno a termino ti limitasion, ken ti SK charter ti agturay para iti sumarsaruno, ken agtalinaed latta dagiti kapitan agingga iti sumaruno nga eleksion inton 2027.
Kalpasan ti panagaprobar ti gakat, kinuna ni Senador Robin Padilla a ti tallo a tawen a termino ket saan nga umdas tapno matungpal dagiti plataporma ken programada.
Impeksa met ni Senador Ramon “Bong” Revilla Jr. ti suportana iti addang ken kinunana a makatulong daytoy tapno matungpal dagiti mandato dagiti barangay.
