Inaprobaran ti Kamara dagiti panakabagi iti maikadua a pannakaibasa ti naisingasing a gakat para iti absolute divorce, ita nga aldaw.
Naaprobaran ti nasao a gakat babaen iti viva voce voting wenno ayes ken nays.
Sigun kenni Edcel Lagman, 1st District Representative ti Albay ken isponsor iti nasao a gakat, saan laeng a para kadagiti saan a naragsak ti kasasaad ti panagasawa ken toxic relationship ti absolute divorce, agsipudta adu dagiti pangibatayan iti diborsio.
Karaman kadagiti pagbasaran iti nadakamat a gakat, ti physical violence wenno grossly abusive iti anak wenno asawa; physical violence wenno moral pressure a mangbalbaliw iti religious wenno political affiliation; drug addiction; habitual alcoholism; chronic gambling ken homosexuality.
Sigun pay kenni Lagman, daytoy ti kapartakan a wagas no idilig iti annulment, agsipudta iti sidong nasao a gakat, nabilin ti maysa a hues a mangikeddeng iti petision para iti divorce iti uneg ti makatawen, kalpasan ti panagleppas ti 60 day a cooling off period.
Kabayatanna, panggep ti nasao a gakat a mawayawayaan dagiti madangdangran nga asawa, nangruna kadagiti babbae a kangrunaan a madangran kadagiti toxic relationship ken unhappy marriage.
