Naisingasing iti Senado ti gakat a mangipalubos kadagiti ubbing nga usaren ti apelyido ti inada no kayatda.
Iti Senate Bill 196 nga impila ni Senate Minority Leader Vicente Sotto III, kinunana a bigbigen ti pagilian ti akem dagiti babbai iti nation-building ken ti patas a karbengan dagiti babbai ken lallaki iti sanguanan ti linteg.
Gapu iti dayta, kinunana a maysa nga isyu a masapul a marisut ti maipapan iti apelyido dagiti lehitimo nga annak.
Panggep ti nasao a gakat a mapalubusan dagiti lehitimo nga annak nga usaren ti apelyido ti inada.
Nakalanad pay iti Senate Bill 196 a mapalubosan dagiti agassawa nga agdesision, no anya ti apelyido a maikabil iti birth certificate ti anak dagitoy.
Iti kanito nga agbalin a linteg ti nasao a gakat, mapalubosan ti lehitimo nga ubing a mangbalbaliw iti apelyidona iti uneg ti 10 a tawen kalpasan ti “age of majority” a saan a kasapulan ti pammmalubos ti korte.
Maminsan laeng a maaramid ti panangbalbaliw iti apeliedo ken saan a maulit.
