Inaprobaran ti House of Representatives ti House Bill No. 11566 wenno Safe Acts Act, iti maikatlo ken maudi a pannakabasa daytoy idi Lunes, Oktubre 12, 2026.
Panggep ti gakat a salakniban dagiti ubbing kadagiti social media ken online gaming platforms.
Pimmabor ti 288 a kongresista, tallo ti kontra, ken awan ti abstention.
Iti sidong ti singasing, maiparit dagiti ubbing nga agtawen iti 12 agpababa nga agaramid ken agaramat iti account iti social media ken dadduma pay a covered digital platforms.
Mapalubusan nga agaramat dagiti agtawen iti 13 agingga 18 ngem addaan iti limitasyon.
Daytoy ket kasaruno ti dumakdakkel a pakaseknan iti maatap a grooming dagiti menor de edad iti social media, pakairamanan dagiti insidente ti pammaltog kadagiti pagadalan iti pagilian.
