BAGUIO CITY– Insumitir ni Benguet Caretaker Congressman Eric Go Yap ti House Bill No. 7136 wenno ti Marketing and Utilization of Local Agricultural Produce Act of 2020 sadiay Kamara.
Paset daytoy ti panangsuportarna kadagiti mannalon iti probinsia ken iti pagilian.
Panggep ti gakat a maipangruna ti panakagatang dagiti produkto dagiti mannalon iti pagilian babaen iti panakaimandato ti direkta a panaggatang dagiti amin a food services kas iti hotels, restaurants ken catering services kadagiti nasao a produkto.
Panggep metlaeng ti nasao nga addang a saan a masayang dagiti apit dagiti mannalon ken mapaginnasideg dagiti mannalon ken dagiti addaan ti negosyo nga agkasapulan iti produkto dagiti mannalon.
Sigun kenni Yap, tartarigagayanna nga agbalin ti Benguet kas central source dagiti nateng para kadagiti lugar nga adayo iti pangalaanda kadagiti nasao a produkto.
