Nangipila iti gakat ni Senator Raffy Tulfo maipapan iti panakaipaay ti pannusa kadagiti bomb jokes wenno panangiwaras iti peke nga impormasyon kadagiti bomb threats, explosives wenno anyaman a life threatening ken destructive a materyales.
Sigun kenni Tulfo, ti chairperson ti senate committee on public services, ti Presidential Decree (PD) No. 1727 wenno Bomb Joke Law a naipasa idi tawen 1980 ket saanen nga updated.
Maibasar iti Presidential Decree (PD) No. 1727, dagiti kaso ti bomb joke ket kadawyan a madisdismiss gapu ta ti hurisdikyon ket iti military tribunal.
Kinuna ni Tulfo a manipud iti datos ti Philippine National Police ket nairekord ti innem a bomb joke kadagiti train station ken sangapulo ket maysa kadagiti airports manipud idi napalabas a tawen agingga iti agdama a tawen.
Inlawlawag ti senador a rumbeng a maliklikan dagiti bomb threats gapu ta daytoy ket makaapektar kadagiti pagadalan, malls, government offices, trains, airports ket kadagiti public places ken maipagarup a pudpudno daytoy rason a mangitunda iti panic kadagiti tattao.
Iti agdama, nalaklaka ti panakaipatungpal ti bomb joke babaen ti panagusar kadagiti social media, text messages, e-mails ken daduma pay.
Babaen ti Senate Bill 2768, ti maximum a pannusa a maipaay kadagiti bomb joke ket P5 million wenno panakaibalud iti innem a tawen depende nu kasano kadagsen ti nagbalin nga epekto ti bomb threat.