BAGUIO CITY – Naipilan sadiay Kamara ti gakat a mangkidkiddaw iti 10-year moratorium wenno 10 a tawen a panakaisardeng ti panagpukan ti kayo ditoy siudad ti Baguio.
Sigun kenni Baguio City Representative Mark Go, awtor ti House Bill 7090, puntirya ti gakat a masalwadan ti nabatbati a 2.5-M a kayo iti siudad, pakairamanan ti 500,000 a Benguet Pine Trees.
Kinunana a no mapagbalin a linteg ti gakat ket maipawil ti panagpukan ti kayo ditoy siudad iti uneg ti 10 a tawen ken sakupenna dagiti pribado ken parapubliko a lote malaksid laeng kadagiti natay, naimpeksion iti peste ken dagiti kayo a mangitunda iti peggad iti biag ken sanikua.
Innayonna nga iti gakat ket maikonsidera ti panakaipreserba dagiti nabatbati a kayo iti disenyo kadagiti lote a pakaipasdekan dagiti aniaman nga istruktura.
Mapatawan iti pannusa a panakaibalud iti dua agingga innem a tawen wenno multa a P100,000 agingga P300,000 ti asinoman a manglabsing iti nasao a gakat no mapagbalin daytoy a linteg.
