Impila ni Senate Minority Leader Vicente Sotto III ti gakat tapno umawat iti 14th-month pay dagiti empleyado iti pribado a sektor.
Sigun iti nasao a Senador, impilana ti gakat tapno matulungan dagiti Pilipino iti pagastusanda iti edukasion ken ti ngumatngato a pagastusan.
Innayon ni Senator Sotto III a naipaulog idi paylaeng 1976 ti Presidential Decree 851 a mangikalikagum kadagiti amin nga employers a mangbayad kadagiti empleadoda iti 13th-month pay.
Isu’t gapuna nga inyunay-unayna a nagbaliwen ti cost of living dagiti tunggal Filipino workers kalpasan ti lima a dekada.
Gapu iti dayta, kinunana a panawenen tapno maawat dagiti empleado iti pribado a sektor ti 14th month pay dagitoy.
Maibasar iti naipila a gakat, maawat dagiti empleado iti pribado a sektor ti 13th-month pay iti June 14 tapno matulongan dagitoy kadagiti gastos iti edukasion para kadagiti annakda.
Kabayatanna, maipaay ti 14th-month pay iti nasapsapa no iti December 24 tapno matulongan dagiti pamilia kadagiti gastos iti holiday ken ngudo ti tawen.
