BAGUIO CITY- Kinemmeg dagiti nagtitipon a pwersa ti otoridad ti maysa a gangannaet ditoy siudad ti Baguio a miembro ti maysa a dakkel a sindikato iti pagilian.
Nabigbig daytoy a ni Mehdi Tenggalen Kobb, 24-anyos, awanan asawa, awanan trabaho, tubo ti Morocco, North Africa ken residente ti San Carlos Heights, Baguio City.
Nakemmeg ti nasao nga indibidual idi kalman kalpasan nga inserbi dagiti otoridad ti dua a warrant of arrest kontra kenkuana.
Naipaulog dagiti nasao a warrant of arrest kontra iti suspek gapu iti kaso daytoy a robbery a naipila sadiay Tarlac City ken robbery in an uninhabited place of private building a naipila sadiay Marikina City.
Addaan ti suspek iti piyansa a dumanon iti P52,000.
Naamuan a ni Kobb ket miembro ti acetylene/bolt-cutter gang nga addaan operasyon iti entero a pagilian.
