Saan pay a nalawag ita nu anya ti nangitunda iti panakaiyanod ti lugan iti paset ti Agno River sadiay Itogon, Benguet idi kalman,March 27,2026 nu sadino,dua kadagiti innem a linaonna ket pimmusay.
Iti panakiuman ti Bombo Radyo kenni Engineer Cyril Batcagan manipod Itogon Municipal Disaster Risk Reduction and Management Office (MDRRMO),kinunana a naibinglay kadakuada a dandanin makaballasiw ti lugan idi maatap a pimmigsa ti ayus ti danom rason a naiyanod daytoy.
Bayat a maiyan-anud ti lugan ket maysa kadagiti linaonna ti rimwar ken maatap a nagpwesto iti tuktok daytoy.
Nupay kasta, kinuna ni Batcagan nga apaman a nabaliktad ti lugan ket napukaw metten ti tao nga adda iti tuktokna a nabigbig iti nagan a Neil Clark Ongchangco, maysa a photojournalist ken residente iti Loakan, Baguio—maysa kadagiti pimmusay ngem immuna a nideklara a mapukpukaw.
Sigun iti opisyal, idi naisalat ti lugan iti batbato ket kinamakam daytoy ti operator ti backhoe loader tapno pandagan ken saanen nga umadayo.
Gapu iti dayta, naispal dagiti uppat a pasaheros bayat a naitaray iti Itogon District Hospital (IDH) ti driver a nabigbig a ni Rodolfo Ong Tan, maysa metlaeng a photographer ken residente iti Session Road, Baguio City.
Nupay kasta, naideklara a dead on arrival ni Tan ngem iti agdama ket saan pay a naipakaamo ti rason ti ipupusayna.
Kabayatanna, kinuna ni Batcagan a saan a damo a napasamak ti kapada nga insidente iti nasao a karayan ngem kadawyan a naar-arayat wenno nareskyu dagiti immuna a nakapasar iti daytoy.
Innayonna a posible a nasayaat a nakaballasiw ti lugan idi paturong paylaeng daytoy idiay Tabu Dalupirip Itogon, Benguet gapu ta sumursurot iti ayos ti danom, ngem idi agsublin daytoy iti Baguio City ket posible a saan a kinabaelan ti lugan a sabaten ti ayos ti danom rason a naiyanod ken saanen a nakasanglad.
Kabayatanna, ti madaldalyasat a dalan iti nasao a disso ket temporaryo laeng a naaramid a pagnaan dagiti equipments para iti maar-aramid a proyekto sadiay, ngem pakipagpagnaan metlaeng dagiti babassit a lugan. //Bombo Rob Dominguez
