BAGUIO CITY – Dumanon iti agarup P377-M ti nabusbus ti lokal a gobyerno ti Baguio iti panagresponde daytoy kontra iti COVID-19 pandemic idi napalabas a dua a tawen.
Sigun kenni City Budget Officer Leticia Clemente, babaen iti nasao a pondo ket nabaelan ken epektibo a naaksionan ti siudad ti nagbalin nga epekto ti pandemya manipud 2020 agingga 2021.
Dinakamatna a kadakkelan a naggastosan ti siudad iti COVID-19 response ket para iti emergency hiring dagiti health workers a naiwaras iti nagduduma nga isolation centers ken iti panakamintinir dagiti nasao a pasilidad.
Innayonna a dakkel metlaeng ti nabusbus ti siudad iti panakagatang dagiti medical supplies a naaramat kadagiti pasyente a nakaptan ti COVID-19 a naipasidong iti mandatory isolation.
Inaklon pay ni Clemente a para iti agdama a tawen ket killaat ti panagbaba ti pondo para iti COVID-19 response, nangruna ta dumanon laengen iti P75.9-M ti pondo para iti daytoy.
Nupay imparipiripna a posible a saan nga umdas ti nasao a pondo tapnu marespondean ti agdama a sitwasyon ti siudad, impettengna nga agtultuloy ti panagbiruk ti lokal a gobyerno iti wagas tapnu masupusupan ti resources ti siudad para iti nasao a pakaseknan.
