BAGUIO CITY – Dumanon iti agarup P67.4-M ti gatad dagiti nadadael a sanikua ditoy siudad ti Baguio gapu iti panagdalapos ti bagyo a Maring.
Nailanad daytoy iti resulta ti Rapid Disaster Assessment and Needs Analysis (RDANA) nga insayangkat ti City Buildings and Architecture Office ken City Engineering Office.
Sigun kenni Antonette Anaban, dadaulo ti City Disaster Risk Reduction and Management Office (CDRRMO), nasurok P27.9-M ti gatad dagiti nadadael kadagiti parapubliko nga imprastraktura bayat nga agarup P39.5-M kadagiti pribado nga imprastraktura.
Saksakupen ti report ti October 11-15 bayat ti panagdalapos ti bagyo a nangibati pay iti tallo nga ipupusay, maysa a panakadangran ken panaka-apektar ti 352 a pamilya wenno 1,362 nga indibidual ditoy siudad.
Nailista pay ti 66 nga insidente a bukbulen ti 36 a panagreggaay ti daga, 16 a panakatumba ti kayo, lima a panaglayos ken dadduma pay.
Naipaayan met iti kaskenan a tulong dagiti naapektaran iti kalamidad, pakairamanan dagiti pamilya a napukawan ti kabagian.
