BAGUIO CITY – Dumanon itan iti nasurok P97-milyon ti nagbalin a pukaw ti siudad ti Baguio iti sektor ti imprastraktura gapu iti Habagat.
Sigun kenni Antonete Anaban, dadaulo ti City Disaster Risk Reduction and Management Council (CDRRMC), nasurok iti P80-milyon ti nagbalin a pukaw iti parapubliko nga imprastraktura ken nasurok P17-milyon ti nagbalin a pukaw iti pribado nga imprastraktura.
Pakairamanan daytoy dagiti naapektaran a pasilidad, sanikua, kalkalsada ken dadduma pay.
Kabayatanna, imbinglay ni Anaban a kadawyan a nailista ditoy siudad kabayatan ti bagyo a Fabian ken habagat ket ti panareggaay ti daga.
Kinunana a napasaran ti nabayag a panagtudtudo isu’t gapuna a limmukneng dagiti ddaga rason ti panagreggaay dagitoy.
Iti datos, nakailista ti siudad iti 82 a panagreggaay ti daga; 43 a bilang ti pannakatumba dagiti kaykayo, 15 a pannakadadael dagiti riprap, walo a flooding ken dadduma pay.
Naapektaran met ti tallo a mannalon iti urban agriculture ditoy siudad no sadino nasurok iti P146, 000 ti nagbalin a pukaw dagitoy ngem mabalin nga agbaliw ti datos agsipodta manarimaan paylaeng ti assesment ti nasao nga opisina.
